Skip to content

Ցանկանո՞ւմ եք, որ Ձեր հրաշք բալիկն առողջ ապագա ունենա

Ցանկանո՞ւմ եք, որ Ձեր հրաշք բալիկն առողջ ապագա ունենա, ուրեմն նրան վաղ հասակից ճիշտ սնուցեք։

Թե ինչպե՞ս, պարզաբանում են «Վարդանանց»ՆԲԿ-ի մանկաբույժները՝ պատասխանելով ծնողների հարցերին։

Հարց – Ե՞րբ սկսեմ երեխայիս հավելյալ սնունդ տալ։

Պատասխան – Երեխայի հավելյալ սնուցումը խորհուրդ է տրվում սկսել 6 ամսականում։ Որոշ դեպքերում մանկաբույժը կարող է խորհուրդ տալ այն սկսել ավելի շուտ։

Հարց Ինչպե՞ս իմանամ, որ երեխաս պատրաստ է հավելյալ սնունդ ընդունելու։

Պատասխան – Երեխաները, սովորաբար, պատրաստ են լինում հավելյալ սնունդ ընդունելու, երբ կարողանում են ուրիշի օգնությամբ նստել, լավ պահում են պարանոցն ու գլուխը, ձեռքերն ու խաղալիքները բերանն են տանում, հետաքրքրություն են ցուցաբերում սննդի նկատմամբ։

Հարց Չեմ կարո՞ղ, արդյոք, երեխայիս հավելյալ սնունդ տալ մինչև 4 ամսականը կամ 6 ամսականից հետո։

Պատասխան – Մինչև 4-6 ամսականը հավելյալ սնունդ տալն օգտակար չէ,  կարող է անգամ վնասակար լինել։ Իսկ 6 ամսականից ուշը կարող է հանգեցնել թերսնուցման, սակավարյունության, կծելու և ծամելու ունակությունների զարգացման դանդաղեցման, հետագայում տարբեր համերից և կոշտ սննդից հրաժարվելուն։

Հարց Ի՞նչ սննդատեսակից սկսել։

Պատասխան – Սկսեք մեկ բաղադրիչ պարունակող սննդից (ընդեղեն, միս, բանջարեղեն, միրգ)։ Առաջին սնունդը պետք է բավականաչափ նոսր, հարած և համասեռ լինի, որպեսզի չառաջացնի կլման դժվարություններ և տրվի միայն գդալով։ Հավելյալ սնունդը անհրաժեշտ է ներմուծել աստիճանաբար՝ սկսելով 1-2 գդալից և 7-10 օրվա ընթացքում ավելացնել խտությունն ու քանակը։

Հարց –  Ինչպե՞ս պատրաստեմ երեխայիս սնունդը։

Պատասխան –  Պատրաստեք սովորականի պես, միայն թե շաքարավազ և աղ մի ավելացրեք։ Փոքրիկները դրանց կարիքը չունեն։

Հարց –  Կարո՞ղ եմ, արդյոք, երեխայիս տալ պատրաստի մանկական սնունդ։

Պատասխան – Այո։ Միայն թե հետևեք տուփի վրա նշված պահպանման կանոններին։ Տնային պայմաններում պատրաստված սննդի հետ մեկտեղ տվեք պատրաստի մանկական սնունդ, քանի որ դրանք հարստացված են երկաթով և անհրաժեշտ այլ նյութերով։

ՀարցԵրեխան ե՞րբ կարող է ինքնուրույն ուտել։

Պատասխան – Երեխաները, սովորաբար, սննդի կտորներն ինքնուրույն վերցնում և ուտում են 8-10 ամսականում։

«Վարդանանց» ՆԲԿ-ի մանկաբույժների թիմը վստահեցնում է՝

միայն ճիշտ և գրագետ կազմակերպած սնուցումը կարող է բավարարել երեխայի աճող օրգանիզմի էներգետիկ պահանջարկը և նպաստել վաղ հասակի երեխաների առողջության ամրապնդմանը, ֆիզիկական և նյարդահոգեբանական ներդաշնակ զարգացմանը։


Աշխատանքային ժամեր

Երկ-Ուր - 08։30-20։00 • Շբթ - 09։00-18։00