ՍԵՌԱՎԱՐԱԿՆԵՐԸ՝ ՍԵՐՆԴԱՐԱՐՄԱՆ ԲԱՑԱՍԱԿԱՆ ԳՈՐԾՈՆ - Վարդանանց նորարարական բժշկական կենտրոնի պաշտոնական կայք

Սեռական ճանապարհով փոխանցվող վարակները, մարդկությանն ուղեկցելով անհիշելի ժամանակներից, մինչև հակաբիոտիկների հայտնաբերումը բազում կյանքեր են խլել։ 2015թ., օրինակ, աշխարհում միայն սիֆիլիսով վարակված է եղել 45.4 միլիոն մարդ, որից 6 միլիոնը՝ նոր դեպք: Արձանագրվել է 107.000 մահ: 1990-ին մահերի թիվը կազմել է 202.000։

Սեռավարակներն այսօր էլ մնում են առողջապահական, սոցիալական և հոգեբանական ամենալուրջ խնդիրներից մեկը։ ԱՀԿ-ն դրանք դասում է հինգ գերակայող առողջապահական խնդիրների շարքը՝ կարևորելով մարդու սերնդարարման վրա դրանց բացասական ներգործությունը։

«ՎԱՐԴԱՆԱՆՑ» նորարարական բժշկության կենտրոնը նախաձեռնում է տեղեկատվական արշավ սեռական ճանապարհով փոխանցվող հիվանդությունների կանխարգելման և հաղթահարման նպատակով։

Շարքը վարում է գինեկոլոգիական ծառայության ղեկավար Լիանա ՄԱՐՏԻՐՈՍՅԱՆԸ։ Սկսենք ամենից տարածված սիֆիլիսից։

Սիֆիլիս. ո՞րն է առաջացման պատճառը

Վարակիչ այս հիվանդության հարուցիչը դժգույն տրեպոնեման է, որը տարածվում է հիմնականում սեռական ճամապարհով։ Հիվանդության փոխանցումը հնարավոր է նաև վնասված մաշկի, համբույրի միջոցով։ Հղի կինը վարակն ընկերքով կարող է փոխանցել պտղին։ Դա կարող է հանգեցնել բնածին սիֆիլիսի զարգացման, ինչի հետևանքով արձանագրվում են բնածին արատներ, անգամ՝ մահ։

Ճանաչե՛ք սիֆիլիսի ախտանշանները

Սիֆիլիսն,ըստ զարգացման փուլերի, բաժանվում է երեք շրջանի։ Առաջին և երկրորդ շրջանում հիվանդը չափազանց վարակիչ է։

Առաջին շրջանում

դիտվում է «կարծր շանկր»՝ անցավ փոքր վերք։ Այն առաջանում է վարակվելուց մոտ 2-3 շաբաթ անց։ Ամենից հաճախ տեղակայված է լինում սեռական օրգանների շրջանում, հետանցքի շուրջը կամ բերանի լորձաթաղանթին։

Երկրորդ շրջանը սկսվում է վարակվելուց 2-6 ամիս անց և տևում է 1-3 ամիս։ Այս շրջանին բնորոշ են՝

- - ցանավորում ձեռքի ափերի և ոտքերի ներբանների վրա
  - ջերմության բարձրացում
  - պարանոցի ավշահանգույցների մեծացում
  - սրտխառնոց
  - մազաթափություն
  - թաց վերքեր սեռական օրգանների կամ հետանցքի շրջանում, որոնք հիշեցնում են գորտնուկներ։

ԵՐՐՈՐԴ ՇՐՋԱՆԻՆ ԲՆՈՐՈՇ ԲԱՐԴՈւԹՅՈւՆՆԵՐԸ ՎՏԱՆԳԱՎՈՐ ԵՆ ԿՅԱՆՔԻ ՀԱՄԱՐ։

Ներքին օրգաններում կամ մաշկի վրա գոյանում են մեծ խոցեր։ Կարող են ախտահարվել սիրտը, ուղեղը, աչքերը, նյարդային համակարգը, ոսկրերը, հոդերը՝ առաջացնելով՝

- - - կաթված
    - կուրություն
    - մտավոր թուլություն
    - խլություն
    - ուղեղաթաղանթի բորբոքում
    - սրտային անբավարարություն և այլն։

Ինչպե՞ս խուսափել սեռավարակներից

Հիշեք, որ հիվանդության կանխարգելումը շատ ավելի հեշտ է, քան բուժումը։

- - Խուսափեք պատահական սեռական կապերից։
  - Օգտագործեք պահպանակ, որը նվազեցնում է վարակների փոխանցումը, սակայն ամբողջովին չի կանխում։
  - Մի չարաշահեք ալկոհոլը, ինչը կարող է թուլացնել Ձեր զգոնությունը և հանգեցնել վտանգավոր սեռական վարքագծի։
  - Հիշեք, որ սեռավարակների փոխանցումն անհնար է կանխել սեռական հարաբերությունից հետո ներլվացումների միջոցով։
  - Պահպանեք առողջ ապրելակերպ, քանի որ ճիշտը սնունդը և ֆիզիկական ակտիվությունը ամրապնդում են իմունային համակարգը։

Լիանա ՄԱՐՏԻՐՈՍՅԱՆԸ հորդորում է հետագա բարդություններից խուսափելու նպատակով հիվանդության առաջին իսկ ախտանշանի դեպքում դիմել մասնագետին։

«Վարդանանց» ՆԲԿ-ում Ձեր խնդրին լուծում կտան՝ առաջնորդվելով ապացուցողական վերջին մոտեցումներով։