Skip to content

ԵՐԱՇԽԱՎՈՐՎՈւՄ Է ԱՆՎՏԱՆԳ ՄԱՅՐՈւԹՅՈւՆ

Հղիությունը յուրաքանչյուր կնոջ կյանքում ամենակարևոր և ամենապատասխանատու շրջաններից է։

«Վարդանանց» նորարարական բժշկության կենտրոնի գինեկոլոգների թիմն ապագա մայրիկների կողքին է և օգնում է նրանց անհրաժեշտ հետազոտություններ անցնել և պատրաստվել անվտանգ, հնարավորինս թեթև և առանց բարդությունների հղիության ու ծննդաբերության։

Գինեկոլոգ Ադրինե ԳՐԻԳՈՐՅԱՆԸ շարունակում է անկեղծ զրույցը մայրանալ ցանկացողների հետ։ Նա իր պացիենտներին խորհուրդ է տալիս հղիություն պլանավորելուց առաջ այցելել բժշկի՝

      • մոր և ապագա պտղի հնարավոր ռիսկերը հայտնաբերելու և կանխարգելելու
      • կնոջը հնարավոր բարդությունների մասին իրազեկելու համար։

Եվ այսպես, մասնագետն ի՞նչ հետազոտություններ է խորհուրդ տալիս անցնել։

      • Արյան ընդհանուր քննություն, երկաթի, ֆերրիտինի մակարդակի որոշում
      • Մեզի ընդհանուր քննություն
      • Քսուք հեշտոցից սեռական ճանապարհով փոխանցվող ինֆեկցիաների հայտնաբերման նպատակով։
      • Արգանդի պարանոցից ՊԱՊ քննություն չարորակ պրոցեսների հայտնաբերման նպատակով։
      • Արյան քննություն ՄԻԱՎի, սիֆիլիսի, հեպատիտ Բ, Ցի հայտնաբերման նպատակով։
      • Վահանձև գեղձի աշխատանքի ստուգում, քանի որ դրա նորմալ ֆունկցիան շատ կարևոր է հղիության նորմալ ընթացքի համար։
      • Արյան քննություն կարմրուկի, կարմրախտի նկատմամբ IgG-ի հայտնաբերման նպատակով։ Բացասական պատասխանի դեպքում խորհուրդ է տրվում կատարել ԿԿԽ պատվաստում, որից հետո մեկ ամիս պաշտպանվել հղիությունից։
      • Ստուգել IgG տոքսոպլազմայի, ցիտոմեգալովիրուսի, հերպես վիրուսների նկատմամբ։ Եթե պատասխանը բացասական է, կատարվում է խորհրդատվություն, կանխարգելման քայլերի հետ ծանոթացում, քանի որ սպեցիֆիկ պրոֆիլակտիկա ՉԿԱ։
      • Այց ստոմատոլոգին։
      • Եթե հայտնաբերվում են կամ արդեն կան ախտորոշված քրոնիկ հիվանդություններ, խորհուրդ եմ տալիս մինչև հղիանալը այցելել համապատասխան նեղ մասնագետներին։

Դե, իսկ հղիության և հետագա ընթացքը կանցնենք միասին։

 

«Վարդանանց» ՆԲԿ-ի գինեկոլոգների մեր թիմը Ձեր հղություն նախապատրաստումն ու վարումը կապահովի աշխարհի լավագույն ուղեցույցներով։